नंदगाव शिवारात २४ एकर सोयाबीनला अज्ञात व्यक्तीकडून आग; ११ लाखांचे नुकसान, नळदुर्ग पोलिस ठाण्यात गुन्हा दाखल.

 

AR न्यूज मराठी, रुपेश डोलारे धाराशिव.

नळदुर्ग : तुळजापूर तालुक्यातील नंदगाव शिवारात अज्ञात व्यक्तीने शेतातील सोयाबीन पिकाला आग लावल्याची घटना घडली. या आगीत शेतकऱ्याचे सुमारे ११ लाख रुपयांचे नुकसान झाले आहे.
याबाबत अधिक माहिती अशी की, नंदगाव येथील शेतकरी दत्तात्रय सोमन्ना येणगुरे (वय ५८) यांच्या नंदगाव शिवारातील गट क्रमांक ५६१ व ५२४ मधील २४ एकर क्षेत्रातील सोयाबीन पिकाला दि. २८ ऑक्टोबर २०२६ रोजी सायंकाळी ७.३० वाजण्याच्या सुमारास अज्ञात व्यक्तीने आग लावली.
या आगीत सोयाबीन पिकाचे मोठ्या प्रमाणात नुकसान झाले असून, अंदाजे ११ लाख रुपयांचा फटका शेतकऱ्याला बसला आहे.
याप्रकरणी दत्तात्रय येणगुरे यांनी ३१ ऑक्टोबर रोजी नळदुर्ग पोलीस ठाण्यात फिर्याद दिली. त्यावरून अज्ञात व्यक्तीविरुद्ध भारतीय न्याय संहिता कलम ३२६ (एफ) अन्वये गुन्हा दाखल करण्यात आला आहे. पुढील तपास नळदुर्ग पोलीस करीत आहेत.